ਅਮਰੀਕਾ ਤੋਂ ਪਿਆਰ ਤੇ ਵਿਆਹ ਦੀ ਆਸ ਲੈ ਕੇ ਪੰਜਾਬ ਆਈ 71 ਸਾਲਾ ਐਨਆਰਆਈ ਰੁਪਿੰਦਰ ਕੌਰ ਦਾ ਬੇਰਹਿਮੀ ਨਾਲ ਕਤਲ ਕਰਵਾਉਣ ਵਾਲਾ ਕੋਈ ਹੋਰ ਨਹੀਂ, ਸਗੋਂ ਉਸ ਦਾ 75 ਸਾਲਾ ਮੰਗੇਤਰ ਚਰਨਜੀਤ ਸਿੰਘ ਗਰੇਵਾਲ (ਬ੍ਰਿਟੇਨ ਵਸਨੀਕ) ਨਿਕਲਿਆ। ਪੁਲਿਸ ਨੇ ਕੇਸ ਨੂੰ ਲਗਭਗ ਦੋ ਮਹੀਨੇ ਪਹਿਲਾਂ ਹੱਲ ਕਰ ਲਿਆ ਸੀ ਅਤੇ ਹੁਣ ਚਰਨਜੀਤ ਨੂੰ ਵਿਦੇਸ਼ੋਂ ਭਾਰਤ ਲਿਆਉਣ ਦੀ ਪ੍ਰਕਿਰਿਆ ਤੇਜ਼ ਕਰ ਦਿੱਤੀ ਹੈ।
ਪੂਰੀ ਕਹਾਣੀ ਇਸ ਤਰ੍ਹਾਂ ਹੈ:
ਚਰਨਜੀਤ ਸਿੰਘ ਨੇ ਮੈਟਰੀਮੋਨੀਅਲ ਸਾਈਟ ’ਤੇ ਰੁਪਿੰਦਰ ਕੌਰ ਨਾਲ ਸੰਪਰਕ ਕੀਤਾ। ਇੱਕ ਸਾਲ ਦੇ ਆਨਲਾਈਨ ਪ੍ਰੇਮ ਸੰਬੰਧ ਤੋਂ ਬਾਅਦ ਉਸ ਨੇ ਵਿਆਹ ਦਾ ਝਾਂਸਾ ਦੇ ਕੇ ਰੁਪਿੰਦਰ ਤੋਂ 35 ਲੱਖ ਰੁਪਏ ਠੱਗ ਲਏ। ਜਦੋਂ ਰੁਪਿੰਦਰ ਨੇ ਵਿਆਹ ਲਈ ਦਬਾਅ ਪਾਇਆ ਤੇ ਬਲਾਤਕਾਰ ਦਾ ਕੇਸ ਕਰਨ ਦੀ ਧਮਾਰ ਲਾਈ ਤਾਂ ਚਰਨਜੀਤ ਨੇ ਕਤਲ ਦੀ ਭਿਆਨਕ ਸਾਜ਼ਿਸ਼ ਰਚੀ।
ਉਸ ਨੇ ਰੁਪਿੰਦਰ ਨੂੰ “ਮੈਂ ਵੀ ਯੂਕੇ ਤੋਂ ਆ ਰਿਹਾ ਹਾਂ, ਵਿਆਹ ਕਰ ਲਈਏ” ਕਹਿ ਕੇ ਜੁਲਾਈ 2025 ਦੇ ਪਹਿਲੇ ਹਫ਼ਤੇ ਲੁਧਿਆਣਾ ਬੁਲਾ ਲਿਆ। ਇੱਥੇ ਉਹ ਕਿਲਾ ਰਾਏਪੁਰ ਕੋਰਟ ਦੇ ਟਾਈਪਿਸਟ ਸੁਖਜੀਤ ਸਿੰਘ ਨਾਲ ਰਹਿਣ ਲੱਗ ਪਈ। ਚਰਨਜੀਤ ਨੇ ਸੁਖਜੀਤ ਤੇ ਉਸ ਦੇ ਭਰਾ ਮਨਵੀਰ ਸਿੰਘ ਉਰਫ਼ ਮਨੀ ਪਹਿਲਵਾਨ ਨੂੰ ਸੁਪਾਰੀ ਦਿੱਤੀ।ਸੁਖਜੀਤ ਨੇ ਰੁਪਿੰਦਰ ਦਾ ਗਲਾ ਘੁੱਟ ਕੇ ਕਤਲ ਕਰ ਦਿੱਤਾ। ਲਾਸ਼ ਨੂੰ ਦੋ ਦਿਨ ਘਰ ਵਿੱਚ ਕੋਲੇ ’ਤੇ ਸਾੜਿਆ ਗਿਆ। ਜਦੋਂ ਸਿਰਫ਼ ਹੱਡੀਆਂ ਰਹਿ ਗਈਆਂ ਤਾਂ ਉਨ੍ਹਾਂ ਨੂੰ ਨਾਲੇ ’ਚ ਸੁੱਟ ਦਿੱਤਾ ਗਿਆ। ਦੋ ਮਹੀਨਿਆਂ ਤੱਕ ਕਿਸੇ ਨੂੰ ਕਤਲੇਸ਼ ਵੀ ਨਹੀਂ ਪਿਆ।
ਪੁਲਿਸ ਨੇ ਸੁਖਜੀਤ ਸਿੰਘ ਨੂੰ ਗ੍ਰਿਫ਼ਤਾਰ ਕਰ ਲਿਆ ਹੈ ਤੇ ਉਸ ਦੀ ਜ਼ਮਾਨਤ ਵੀ ਰੱਦ ਹੋ ਚੁੱਕੀ ਹੈ। ਹੁਣ ਡੇਹਲੋਂ ਪੁਲਿਸ ਮਨਵੀਰ ਪਹਿਲਵਾਨ ਦੀ ਭਾਲ ’ਚ ਲੱਗੀ ਹੋਈ ਹੈ। ਟੀਮਾਂ ਚੰਡੀਗੜ੍ਹ, ਖਮਾਣੋਂ ਤੇ ਕਬੱਡੀ ਟੂਰਨਾਮੈਂਟਾਂ ’ਤੇ ਛਾਪੇ ਮਾਰ ਰਹੀਆਂ ਨੇ, ਕਿਉਂਕਿ ਮਨਵੀਰ ਪਹਿਲਵਾਨ ਕਬੱਡੀ ਖਿਡਾਰੀ ਵੀ ਹੈ।
ਪੁਲਿਸ ਕੋਲ ਮਨਵੀਰ ਦੀਆਂ ਕੁਝ ਵੀਡੀਓ ਕਲਿੱਪ ਵੀ ਆ ਗਈਆਂ ਨੇ, ਜਿਨ੍ਹਾਂ ਦੇ ਅਧਾਰ ’ਤੇ ਉਸ ਦਾ ਟਿਕਾਣਾ ਲੱਭਿਆ ਜਾ ਰਿਹਾ ਹੈ।ਇਸੇ ਦੌਰਾਨ ਮੁੱਖ ਸਾਜ਼ਿਸ਼ਕਰਤਾ ਚਰਨਜੀਤ ਸਿੰਘ ਗਰੇਵਾਲ ਹਾਲੇ ਵਿਦੇਸ਼ ’ਚ ਫ਼ਰਾਰ ਹੈ। ਪੁਲਿਸ ਉਸ ਨੂੰ ਭਾਰਤ ਲਿਆਉਣ ਲਈ ਇੰਟਰਪੋਲ ਤੇ ਹੋਰ ਕਾਨੂੰਨੀ ਰਸਤੇ ਅਪਣਾ ਰਹੀ ਹੈ।
