ਸਤੰਬਰ 2025 ਵਿੱਚ ਕਈ ਅਹਿਮ ਵਿੱਤੀ ਅਤੇ ਸੇਵਾ ਸਬੰਧੀ ਬਦਲਾਅ ਲਾਗੂ ਹੋਣ ਜਾ ਰਹੇ ਹਨ, ਜੋ ਆਮ ਲੋਕਾਂ ਦੀ ਜੇਬ ਅਤੇ ਰੋਜ਼ਮਰ੍ਹਾ ਜੀਵਨ ਨੂੰ ਪ੍ਰਭਾਵਿਤ ਕਰਨਗੇ। ਇਹਨਾਂ ਵਿੱਚ ਆਈਟੀਆਰ ਫਾਈਲਿੰਗ, ਬੈਂਕਿੰਗ, ਕ੍ਰੈਡਿਟ ਕਾਰਡ, ਅਤੇ ਇੰਡੀਆ ਪੋਸਟ ਸੇਵਾਵਾਂ ਸ਼ਾਮਲ ਹਨ।
1. ਆਈਟੀਆਰ ਫਾਈਲਿੰਗ ਦੀ ਨਵੀਂ ਮਿਤੀ: ਅਸੈਸਮੈਂਟ ਸਾਲ 2025-26 ਲਈ ਆਮਦਨ ਟੈਕਸ ਰਿਟਰਨ (ਆਈਟੀਆਰ) ਫਾਈਲ ਕਰਨ ਦੀ ਆਖਰੀ ਮਿਤੀ 15 ਸਤੰਬਰ 2025 ਹੈ। ਇਹ ਉਹਨਾਂ ਟੈਕਸਦਾਤਾਵਾਂ ਲਈ ਹੈ, ਜਿਨ੍ਹਾਂ ਦੇ ਖਾਤਿਆਂ ਦਾ ਆਡਿਟ ਨਹੀਂ ਕਰਨਾ। ਸਮਾਂ ਸੀਮਾ ਤੋਂ ਬਾਅਦ ਫਾਈਲਿੰਗ ‘ਤੇ ਜੁਰਮਾਨਾ ਅਤੇ ਵਿਆਜ ਲੱਗ ਸਕਦਾ ਹੈ। ਸਮੇਂ ਸਿਰ ਫਾਈਲਿੰਗ ਲਈ ਫਾਰਮ 26ਏਐਸ ਅਤੇ ਏਆਈਐਸ ਦੀ ਜਾਂਚ ਜ਼ਰੂਰੀ ਹੈ।
- ਜਨ ਧਨ ਖਾਤਾ ਕੇਵਾਈਸੀ: ਜਨ ਧਨ ਖਾਤਾ ਧਾਰਕਾਂ ਨੂੰ 30 ਸਤੰਬਰ ਤੱਕ ਕੇਵਾਈਸੀ ਅਪਡੇਟ ਕਰਨੀ ਹੋਵੇਗੀ। ਅਜਿਹਾ ਨਾ ਕਰਨ ਨਾਲ ਨਕਦੀ ਕਢਵਾਉਣ, ਸਬਸਿਡੀ ਟ੍ਰਾਂਸਫਰ, ਅਤੇ ਹੋਰ ਸੇਵਾਵਾਂ ਵਿੱਚ ਰੁਕਾਵਟ ਆ ਸਕਦੀ ਹੈ। ਬੈਂਕ ਪੰਚਾਇਤ ਪੱਧਰ ‘ਤੇ ਕੈਂਪ ਲਗਾ ਰਹੇ ਹਨ ਅਤੇ ਔਨਲਾਈਨ ਜਾਂ ਘਰੇਲੂ ਕੇਵਾਈਸੀ ਸਹੂਲਤ ਵੀ ਦੇ ਰਹੇ ਹਨ।
- ਐਸਬੀਆਈ ਕ੍ਰੈਡਿਟ ਕਾਰਡ ਨਿਯਮ: 1 ਸਤੰਬਰ ਤੋਂ, ਐਸਬੀਆਈ ਦੇ ਕਈ ਸਹਿ-ਬ੍ਰਾਂਡ ਕਾਰਡਾਂ ‘ਤੇ ਡਿਜੀਟਲ ਗੇਮਿੰਗ ਅਤੇ ਸਰਕਾਰੀ ਭੁਗਤਾਨਾਂ ਲਈ ਰਿਵਾਰਡ ਪੁਆਇੰਟ ਨਹੀਂ ਮਿਲਣਗੇ। ਹਵਾਈ ਦੁਰਘਟਨਾ ਬੀਮਾ ਵੀ ਹਟਾਇਆ ਜਾ ਰਿਹਾ ਹੈ। 16 ਸਤੰਬਰ ਤੋਂ ਨਵੀਂ ਕਾਰਡ ਸੁਰੱਖਿਆ ਯੋਜਨਾ (ਸੀਪੀਪੀ) ਲਾਗੂ ਹੋਵੇਗੀ, ਜਿਸ ਵਿੱਚ ਧੋਖਾਧੜੀ ਸੁਰੱਖਿਆ ਅਤੇ ਯਾਤਰਾ ਸਹਾਇਤਾ ਸ਼ਾਮਲ ਹੈ।
- ਇੰਡੀਆ ਪੋਸਟ ਬਦਲਾਅ: 1 ਸਤੰਬਰ ਤੋਂ, ਰਜਿਸਟਰਡ ਪੋਸਟ ਅਤੇ ਸਪੀਡ ਪੋਸਟ ਮਿਲਾ ਦਿੱਤੇ ਜਾਣਗੇ। ਸਾਰੇ ਮਹੱਤਵਪੂਰਨ ਦਸਤਾਵੇਜ਼ ਅਤੇ ਪਾਰਸਲ ਸਪੀਡ ਪੋਸਟ ਵਜੋਂ ਭੇਜੇ ਜਾਣਗੇ, ਜਿਸ ਨਾਲ ਡਿਲੀਵਰੀ ਅਤੇ ਟਰੈਕਿੰਗ ਸੁਧਰੇਗੀ।
- ਵਿਸ਼ੇਸ਼ ਐਫਡੀ ਸਕੀਮਾਂ: ਇੰਡੀਅਨ ਬੈਂਕ ਅਤੇ ਆਈਡੀਬੀਆਈ ਬੈਂਕ ਦੀਆਂ 444, 555, ਅਤੇ 700 ਦਿਨਾਂ ਵਾਲੀਆਂ ਵਿਸ਼ੇਸ਼ ਐਫਡੀ ਸਕੀਮਾਂ 30 ਸਤੰਬਰ ਨੂੰ ਬੰਦ ਹੋਣਗੀਆਂ। ਨਿਵੇਸ਼ ਦਾ ਮੌਕਾ ਸਤੰਬਰ ਤੱਕ ਸੀਮਤ ਹੈ।
- ਪੈਨਸ਼ਨ ਸਕੀਮ ਵਿਕਲਪ: ਕੇਂਦਰੀ ਸਰਕਾਰੀ ਕਰਮਚਾਰੀ 30 ਸਤੰਬਰ ਤੱਕ ਨੈਸ਼ਨਲ ਪੈਨਸ਼ਨ ਸਕੀਮ (ਐਨਪੀਐਸ) ਤੋਂ ਯੂਨੀਫਾਈਡ ਪੈਨਸ਼ਨ ਸਕੀਮ (ਯੂਪੀਐਸ) ਵਿੱਚ ਸਵਿੱਚ ਕਰ ਸਕਦੇ ਹਨ।
