ਬਿਊਰੋ ਰਿਪੋਰਟ (29 ਨਵੰਬਰ, 2025): ਆਸਟ੍ਰੇਲੀਆ ਦੇ ਪ੍ਰਧਾਨ ਮੰਤਰੀ ਐਂਥਨੀ ਅਲਬਨੀਜ਼ ਨੇ ਸ਼ਨੀਵਾਰ ਨੂੰ ਆਪਣੀ ਪਾਰਟਨਰ ਜੋਡੀ ਹੇਡਨ ਨਾਲ ਵਿਆਹ ਕਰਵਾ ਲਿਆ ਹੈ। 62 ਸਾਲਾ ਅਲਬਨੀਜ਼ ਆਸਟ੍ਰੇਲੀਆ ਦੇ ਪਹਿਲੇ ਅਜਿਹੇ ਪ੍ਰਧਾਨ ਮੰਤਰੀ ਬਣ ਗਏ ਹਨ, ਜਿਨ੍ਹਾਂ ਨੇ ਅਹੁਦੇ ‘ਤੇ ਰਹਿੰਦਿਆਂ ਵਿਆਹ ਕੀਤਾ ਹੈ।
ਅਲਬਨੀਜ਼ ਨੇ 46 ਸਾਲਾ ਜੋਡੀ ਹੇਡਨ ਨਾਲ ਕੈਨਬਰਾ ਸਥਿਤ ਪ੍ਰਧਾਨ ਮੰਤਰੀ ਦਫ਼ਤਰ (PM Office) ਵਿੱਚ ਵਿਆਹ ਕੀਤਾ। ਹੇਡਨ ਵਿੱਤੀ ਸੇਵਾਵਾਂ (Financial Services) ਦੇ ਖੇਤਰ ਵਿੱਚ ਕੰਮ ਕਰਦੀ ਹੈ। ਅਲਬਨੀਜ਼ ਨੇ ਫਰਵਰੀ 2024 ਵਿੱਚ ਹੇਡਨ ਨਾਲ ਮੰਗਣੀ ਕੀਤੀ ਸੀ।
ਪ੍ਰਧਾਨ ਮੰਤਰੀ ਨੇ ਸੋਸ਼ਲ ਮੀਡੀਆ ‘ਤੇ ਸਿਰਫ਼ ਇੱਕ ਸ਼ਬਦ ਵਿੱਚ ਪੋਸਟ ਕੀਤਾ – ‘Married’ (ਵਿਆਹਿਆ)। ਉਨ੍ਹਾਂ ਨੇ ਇੱਕ ਵੀਡੀਓ ਵੀ ਸਾਂਝਾ ਕੀਤਾ, ਜਿਸ ਵਿੱਚ ਉਹ ਬੋ-ਟਾਈ ਪਹਿਨ ਕੇ ਆਪਣੀ ਮੁਸਕਰਾਉਂਦੀ ਦੁਲਹਨ ਦਾ ਹੱਥ ਫੜੇ ਹੋਏ ਨਜ਼ਰ ਆ ਰਹੇ ਹਨ।
ਅਲਬਨੀਜ਼ ਅਤੇ ਹੇਡਨ ਸੋਮਵਾਰ ਤੋਂ ਸ਼ੁੱਕਰਵਾਰ ਤੱਕ ਆਸਟ੍ਰੇਲੀਆ ਵਿੱਚ ਹੀ ਹਨੀਮੂਨ ਮਨਾਉਣਗੇ। ਖਾਸ ਗੱਲ ਇਹ ਹੈ ਕਿ ਉਹ ਹਨੀਮੂਨ ਦਾ ਪੂਰਾ ਖਰਚਾ ਆਪਣੀ ਜੇਬ੍ਹ ਵਿੱਚੋਂ ਦੇਣਗੇ, ਮਤਲਬ ਕਿ ਕੋਈ ਸਰਕਾਰੀ ਮਦਦ ਨਹੀਂ ਲੈਣਗੇ।
ਆਸਟ੍ਰੇਲੀਆਈ ਪ੍ਰਧਾਨ ਮੰਤਰੀ ਦਾ ਇਹ ਦੂਜਾ ਵਿਆਹ ਹੈ। ਉਨ੍ਹਾਂ ਨੇ 2019 ਵਿੱਚ ਆਪਣੀ ਸਾਬਕਾ ਪਤਨੀ ਕਾਰਮੇਲ ਟੇਬਟ ਤੋਂ ਤਲਾਕ ਲਿਆ ਸੀ। ਇਹ ਵਿਆਹ 19 ਸਾਲ ਚੱਲਿਆ ਸੀ ਅਤੇ ਇਸ ਰਿਸ਼ਤੇ ਤੋਂ ਉਨ੍ਹਾਂ ਦਾ ਇੱਕ ਬੇਟਾ ਨਾਥਨ ਹੈ।
ਅਲਬਨੀਜ਼ ਅਤੇ ਹੇਡਨ ਦੀ ਮੁਲਾਕਾਤ 2020 ਵਿੱਚ ਮੈਲਬੌਰਨ ਵਿੱਚ ਇੱਕ ਬਿਜ਼ਨਸ ਡਿਨਰ ਦੌਰਾਨ ਹੋਈ ਸੀ। ਹੇਡਨ ਦਾ ਵੀ ਇਹ ਦੂਜਾ ਵਿਆਹ ਹੈ, ਹਾਲਾਂਕਿ ਉਨ੍ਹਾਂ ਦੇ ਪਹਿਲੇ ਵਿਆਹ ਅਤੇ ਤਲਾਕ ਬਾਰੇ ਜਨਤਕ ਤੌਰ ‘ਤੇ ਜ਼ਿਆਦਾ ਜਾਣਕਾਰੀ ਉਪਲਬਧ ਨਹੀਂ ਹੈ।
