ਚੰਡੀਗੜ੍ਹ : ਸੈਕਟਰ-39 ਥਾਣੇ ਦੇ ਐਡੀਸ਼ਨਲ ਐੱਸਐੱਚਓ ਐੱਸਆਈ ਨਵੀਨ ਫੋਗਾਟ ਨੇ ਆਪਣੇ ਦੋ ਕਾਂਸਟੇਬਲਾਂ ਨਾਲ ਮਿਲ ਕੇ ਇੱਕ ਵਪਾਰੀ ਤੋਂ ਇੱਕ ਕਰੋੜ ਇੱਕ ਲੱਖ ਰੁਪਏ ਦੀ ਲੁੱਟ ਦੀ ਵਾਰਦਾਤ ਨੂੰ ਅੰਜਾਮ ਦਿੱਤਾ ਹੈ। ਇਸ ਪੂਰੀ ਘਟਨਾ ਵਿੱਚ ਪੀੜਤ ਵਪਾਰੀ ਦੇ ਸਾਥੀਆਂ ਨੇ ਵੀ ਨਵੀਨ ਦਾ ਸਾਥ ਦਿੱਤਾ। ਇੰਨਾ ਹੀ ਨਹੀਂ ਇਸ ਸਭ ਤੋਂ ਬਾਅਦ ਅਗਲੇ ਦਿਨ ਜਦੋਂ ਪੀੜਤ ਕਾਰੋਬਾਰੀ ਸ਼ਿਕਾਇਤ ਕਰਨ ਸੈਕਟਰ-39 ਪਹੁੰਚਿਆ ਤਾਂ ਨਵੀਨ ਫੋਗਾਟ ਨੇ ਉਸ ਨੂੰ ਉੱਥੇ ਪਛਾਣ ਲਿਆ। ਦੋਸ਼ ਹੈ ਕਿ ਨਵੀਨ ਨੇ ਕਾਰੋਬਾਰੀ ਨੂੰ ਧਮਕੀ ਦਿੱਤੀ ਸੀ।
ਇਸ ਦੇ ਨਾਲ ਹੀ ਹੁਣ ਮਾਮਲਾ ਸਾਹਮਣੇ ਆਇਆ ਹੈ ਕਿ ਸੈਕਟਰ-39 ਥਾਣੇ ਦੀ ਪੁਲਿਸ ਨੇ ਐੱਸਆਈ ਨਵੀਨ ਸਮੇਤ ਤਿੰਨ ਨਿੱਜੀ ਵਿਅਕਤੀਆਂ ਖ਼ਿਲਾਫ਼ ਅਗਵਾ, ਸਾਜ਼ਸ਼ ਰਚਣ, ਫਿਰੌਤੀ ਵਸੂਲਣ, ਧੋਖਾਧੜੀ ਅਤੇ ਧਮਕਾਉਣ ਦੀਆਂ ਧਾਰਾਵਾਂ ਤਹਿਤ ਕੇਸ ਦਰਜ ਕੀਤਾ ਹੈ। ਨਵੀਨ ਨੂੰ ਦੂਜੀ ਵਾਰ ਪੁਲਿਸ ਵਿਭਾਗ ਤੋਂ ਮੁਅੱਤਲ ਕੀਤਾ ਗਿਆ ਹੈ। ਇਸ ਤੋਂ ਪਹਿਲਾਂ ਨਵੀਨ ਫੋਗਾਟ ਨੂੰ ਜਬਰ ਜਨਾਹ ਦੇ ਮਾਮਲੇ ਵਿੱਚ ਮੁਅੱਤਲ ਕੀਤਾ ਗਿਆ ਸੀ। ਇਸ ਮਾਮਲੇ ਵਿੱਚ ਪੁਲਿਸ ਨੇ ਕਾਰੋਬਾਰੀ ਸੰਜੇ ਗੋਇਲ ਕੋਲ ਇੱਕ ਕਰੋੜ ਦੀ ਰਕਮ ਦੀ ਜਾਂਚ ਲਈ ਆਮਦਨ ਕਰ ਵਿਭਾਗ ਨੂੰ ਵੀ ਲਿਖਿਆ ਸੀ।
ਇਸ ਮਾਮਲੇ ਵਿੱਚ ਧਾਰਾ 365 (ਅਗਵਾ), 386 (ਜ਼ਬਰਦਸਤੀ), 420 (ਸਾਜ਼ਸ਼), 506 (ਜਾਨ ਦੀਆਂ ਧਮਕੀਆਂ ਦੇਣਾ) ਅਤੇ 120ਬੀ (ਕਿਸੇ ਅਪਰਾਧ ਦੀ ਯੋਜਨਾ ਦਾ ਹਿੱਸਾ ਹੋਣਾ) ਦੇ ਤਹਿਤ ਕੇਸ ਦਰਜ ਕੀਤਾ ਗਿਆ ਹੈ। ਮੁਲਜ਼ਮ ਫ਼ਰਾਰ ਹਨ।
ਦੱਸ ਦੇਈਏ ਕਿ ਸਬ-ਇੰਸਪੈਕਟਰ ਨਵੀਨ ਅਤੇ ਉਸ ਦੇ ਸਾਥੀ ਪੁਲਿਸ ਮੁਲਾਜ਼ਮਾਂ ‘ਤੇ ਬਠਿੰਡਾ ਦੇ ਇੱਕ ਵਪਾਰੀ ਤੋਂ 2000 ਰੁਪਏ ਦੇ ਨੋਟ ਬਦਲਣ ਦੇ ਬਹਾਨੇ ਯੋਜਨਾਬੱਧ ਤਰੀਕੇ ਨਾਲ ਲੁੱਟਣ ਦਾ ਦੋਸ਼ ਹੈ। ਇਸ ਦੇ ਲਈ ਉਸ ਨੇ ਪਹਿਲੇ ਕਾਰੋਬਾਰੀ ਨੂੰ ਅਗਵਾ ਕੀਤਾ। ਫਿਰ ਉਸ ਕੋਲੋਂ ਇਕ ਕਰੋੜ ਰੁਪਏ ਲੁੱਟ ਲਏ। ਇਹ ਮਾਮਲਾ ਦੋ ਦਿਨਾਂ ਤੱਕ ਦਬਾਈ ਰੱਖਿਆ। ਪਰ ਜਦੋਂ ਮਾਮਲਾ ਧਿਆਨ ਵਿੱਚ ਆਇਆ ਤਾਂ ਚੰਡੀਗੜ੍ਹ ਦੀ ਐਸਐਸਪੀ ਕੰਵਰਦੀਪ ਕੌਰ ਨੇ ਖ਼ੁਦ ਜਾਂਚ ਸ਼ੁਰੂ ਕਰ ਦਿੱਤੀ। ਦੋਸ਼ੀ ਐਸਆਈ ਨਵੀਨ ਫੋਗਾਟ ਅਤੇ ਹੋਰ ਪੁਲਿਸ ਮੁਲਾਜ਼ਮਾਂ ਖ਼ਿਲਾਫ਼ ਸੈਕਟਰ-39 ਥਾਣੇ ਵਿੱਚ ਹੀ ਕੇਸ ਦਰਜ ਕਰ ਲਿਆ ਗਿਆ ਹੈ।
ਇਹ ਮਾਮਲਾ ਹੈ
ਮਾਮਲਾ 4 ਅਗਸਤ ਦਾ ਹੈ। ਬਠਿੰਡਾ ਨਿਵਾਸੀ ਵਪਾਰੀ ਸੰਜੇ ਗੋਇਲ ਨੇ ਸ਼ਿਕਾਇਤ ਕੀਤੀ ਕਿ ਉਸ ਦੇ ਦੋਸਤ ਨੇ ਕਿਹਾ ਕਿ ਉਸ ਦੇ ਜਾਣਕਾਰ ਨੇ 2000 ਰੁਪਏ ਦੇ ਨੋਟ ਬਦਲਵਾਉਣੇ ਹਨ। ਇਸ ਦੇ ਲਈ ਉਹ 500-500 ਦੇ ਇੱਕ ਹਜ਼ਾਰ ਦੇ ਨੋਟ ਲੈ ਕੇ ਮੋਹਾਲੀ ਪਹੁੰਚਿਆ। ਫਿਰ ਉਹ ਐਰੋਸਿਟੀ ਰੋਡ ‘ਤੇ ਸਥਿਤ ਬ੍ਰਾਈਟ ਇਮੀਗ੍ਰੇਸ਼ਨ ਪਹੁੰਚਿਆ। ਇੱਥੋਂ ਸਰਵੇਸ਼ ਨਾਂ ਦਾ ਵਿਅਕਤੀ ਉਸ ਨੂੰ ਚੰਡੀਗੜ੍ਹ ਦੇ ਸੈਕਟਰ-40 ਵਿੱਚ ਲੈ ਗਿਆ।
ਇੱਥੇ ਇੱਕ ਸਬ-ਇੰਸਪੈਕਟਰ ਸਮੇਤ ਤਿੰਨ ਹੋਰ ਪੁਲਿਸ ਮੁਲਾਜ਼ਮ ਪਹਿਲਾਂ ਹੀ ਵਰਦੀ ਵਿੱਚ ਖੜ੍ਹੇ ਸਨ। ਸਾਰੇ ਪੁਲਿਸ ਵਾਲੇ ਇਕੱਠੇ ਹੋ ਕੇ ਕਾਰ ਵਿਚ ਦਾਖਲ ਹੋਏ ਅਤੇ ਉਸ ਨੂੰ ਅਤੇ ਇਸ ਦੇ ਡਰਾਈਵਰ ਨੂੰ ਫੜ ਲਿਆ, ਜਦਕਿ ਗਿੱਲ ਅਤੇ ਸਰਵੇਸ਼ ਪੁਲਿਸ ਦੇ ਕਹਿਣ ‘ਤੇ ਉੱਥੋਂ ਚਲੇ ਗਏ। ਇਸ ਤੋਂ ਬਾਅਦ ਪੁਲਿਸ ਮੁਲਾਜ਼ਮਾਂ ਨੇ ਕਾਰ ਦੀ ਤਲਾਸ਼ੀ ਲਈ ਅਤੇ ਪੈਸੇ ਕੱਢ ਲਏ।
ਸੰਜੇ ਨੇ ਦੱਸਿਆ ਕਿ ਪੁਲਿਸ ਟੀਮ ਉਸ ਨੂੰ ਕਾਰ ਅਤੇ ਪੈਸਿਆਂ ਸਮੇਤ ਸੈਕਟਰ-40 ਦੇ ਬੀਟ ਬਾਕਸ ਕੋਲ ਲੈ ਗਈ। ਇੱਥੋਂ ਉਸ ਨੂੰ ਗਿਰੀ ਮੰਡੀ ਨੇੜੇ ਸੈਕਟਰ-39 ਲਿਜਾਇਆ ਗਿਆ। ਇਸ ਤੋਂ ਬਾਅਦ ਸਾਰੀ ਰਕਮ ਇੱਕ ਡਸਟਰ ਕਾਰ ਵਿੱਚ ਰੱਖੀ ਗਈ। ਪੁਲਿਸ ਟੀਮ ਨੇ ਉਸ ਨੂੰ ਪੈਸੇ ਛੱਡ ਕੇ ਭੱਜਣ ਲਈ ਕਿਹਾ, ਜਿਸ ‘ਚ ਅਸਫਲ ਰਹਿਣ ‘ਤੇ ਉਸ ਨੂੰ ਮੁਕਾਬਲੇ ਦੀ ਧਮਕੀ ਦਿੱਤੀ ਗਈ।
ਸੰਜੇ ਮੁਤਾਬਕ ਇਸ ਦੌਰਾਨ ਇਕ ਅਧਿਕਾਰੀ ਮਰਸਡੀਜ਼ ਕਾਰ ‘ਚ ਵੀ ਪਹੁੰਚ ਗਿਆ ਪਰ ਕਾਰ ‘ਚ ਸਵਾਰ ਵਿਅਕਤੀ ਬਾਹਰ ਨਹੀਂ ਆਇਆ। ਇਸ ਤੋਂ ਬਾਅਦ ਉਸ ਨੂੰ ਉੱਥੋਂ ਭਜਾ ਦਿੱਤਾ ਗਿਆ। ਪਰ ਉਸ ਨੇ ਘਰ ਜਾ ਕੇ ਲੁੱਟ ਦੀ ਘਟਨਾ ਆਪਣੇ ਪਰਿਵਾਰ ਨੂੰ ਦੱਸੀ। ਉਦੋਂ ਹੀ ਮਾਮਲਾ ਐਸਐਸਪੀ ਕੰਵਰਦੀਪ ਕੌਰ ਤੱਕ ਪਹੁੰਚਿਆ।
ਡੀਐਸਪੀ ਚਰਨਜੀਤ ਨੇ ਸ਼ਿਕਾਇਤਕਰਤਾ ਸੰਜੇ ਨੂੰ ਸੈਕਟਰ-39 ਬੁਲਾਇਆ, ਜਿੱਥੇ ਉਸ ਨੇ ਐਸਆਈ ਨਵੀਨ ਫੋਗਾਟ ਨੂੰ ਪਛਾਣ ਲਿਆ। ਸੰਜੇ ਨੇ ਦੱਸਿਆ ਕਿ ਨਵੀਨ ਫੋਗਾਟ ਉਸ ਨੂੰ ਬਾਹਰ ਲੈ ਗਿਆ ਅਤੇ ਉਸ ਨਾਲ ਡੀਲ ਕਰਨ ਲੱਗਾ। ਨਾ ਮੰਨਣ ‘ਤੇ ਉਹ ਥਾਣੇ ਤੋਂ ਫ਼ਰਾਰ ਹੋ ਗਿਆ। ਦੇਰ ਰਾਤ ਥਾਣਾ-39 ਦੀ ਪੁਲਿਸ ਨੇ ਇਮੀਗ੍ਰੇਸ਼ਨ ਕੰਪਨੀ ਦੇ ਐਸਆਈ ਨਵੀਨ ਫੋਗਾਟ, ਸਰਵੇਸ਼ ਕੌਸ਼ਲ, ਗਿੱਲ ਅਤੇ ਜਤਿੰਦਰ ਸਮੇਤ ਤਿੰਨ ਅਣਪਛਾਤੇ ਪੁਲਿਸ ਮੁਲਾਜ਼ਮਾਂ ਖ਼ਿਲਾਫ਼ ਕੇਸ ਦਰਜ ਕੀਤਾ ਹੈ। ਇਸ ਮਾਮਲੇ ‘ਚ ਕੁਝ ਪੁਲਿਸ ਅਧਿਕਾਰੀਆਂ ਦੀ ਭੂਮਿਕਾ ਦੀ ਵੀ ਜਾਂਚ ਕੀਤੀ ਜਾ ਰਹੀ ਹੈ।
